llexislación
L’Estatutu (impuestu) d’Asturies diz, ya munches vegaes, que les instituciones asturianes tienen el compromisu na proteición del patrimoniu asina como cola participación de tolos ciudadanos (nun diz nada d’aldeanos, masque vamos dicilo nós) na vida cultural. Recoñocen que dende’l sieglu XVIII, polo menos, hai referencies haza la importancia de caltener ya protexer los monumentos ya tradiciones de nueso, sobro tou, por parte los poderes públicos.
Anque, tamién dicen que tanto l’alministración asturiana como los ayuntamientos asturianos esforciáronse muncho nes caberes décades (esto ye del añu 2001… Hai que tener muncha cara pa dexalu reflexáu nun papel d’una llei.).
Entá nun lleímos la Llei 16/1985 del patrimoniu hestóricu español, poro imaxinamos que le llei asturiana cmplirá al rodiu l’ordenamientu xurídicu. Asina, por medio la Llei 01/2001, créanse dos rexistros pa rexistrar ya catalogar los bienes: ún ye’l de los Bienes d’Interés Cultural (BIC, de mayor rangu), ya l’otru ye l’Inventariu del Patrimoniu Cultural (IPC, de menor rangu). Anque tamién queda regulao’l régimen xurídicu de los patrimonios arqueolóxicu, etnográficu, hestóricu-industrial, documental ya bibliográficu.
Diz l’artículu 1.1 de la Llei 01/2001, que «La presente Llei tien por oxetu la conservación, proteición, investigación, arriquecimientu, fomentu ya esparder el Patrimoniu Cultural d’Asturies, de mou ya manera que puea ser esfrutáu polos ciudadanos ya tresmitíu nes meyores condiciones a les xeneraciones futures.»
Ya según l’artículu 4.1 de la Llei 01/2001, «Les persones qu’observen una situación d’amenaza o de destrucción acaecida o inminente d’un bien integrante del Patrimoniu Cultural d’Asturies tarán obligaos a comunicalo darréu a la Conseyería d’Educación ya Cultura, que comprobará l’oxetu la denuncia ya actuará a tenor del mandáu na presente Llei.». Polo que tamos obligaos, non yá por salvar horros ya paneres del esbarrumbe, esto ye, pol patrimoniu asturianu, sinón porque dizlo la llei.
Amás, ya mui importante, ye lo que diz l’artículu 27.1 de la Llei 01/2001: «Los Ayuntamientos tán obligaos a incluyir en catálogos ellaboraos d’alcuerdu cola llexislación urbanística los bienes inmuebles que, pol so interés históricu, artísticu, arqueolóxicu, etnográficu o de cualisquier otra naturaleza cultural, merezan la pena conservase, anque nun tean relevancia bastante pa ser declaraos Bien de Interés Cultural o incluyíos nel Inventariu del Patrimoniu Cultural d’Asturies. Estos bienes tarán estremaos de cuantos seyan recoyíos nos catálogos urbanísticos por razones diferenies del so interés cultural. La catalogación sedrá complementaria de las determinaciones del plan xeneral municipal, o del plan especial, ya definirá los tipos d’intervención posible, los plazos, en su caso, na que dicha intervención vaya desendolcase ya’l nivel de proteición de cada bien incluyío nella. El nivel de proteición integral llevará consigo l’aplicación de les normes d’esta llei que se refieren al Inventariu del Patrimoniu Cultural de Asturias.