lliteratura

Equí va un sonetu fechu por Pachu’l Péritu (Francisco González Prieto) ya espublizáu nel llibru «La vida asturiana nun cientu de sonetos» en Xixón nel añu 1921.

L’horriu

Ye un caxón de satañu sofitáu
sobre cuatro pegollos: nos pilpayos,
aguilones, cabrios y pingayos
qu’aguanten poles ripies y el teyáu.

Facen pa les xuntures ensambláu
les colondres, embelgos y los gayos,
colos trabes, que paecen espantayos;
puestu na basamenta y afianzáu.

La subidoria ta con escalones
desepartá por mor de los ratones
pos va la talandoria p’hacia afuera:

S’abre la puerta esin dengún engorriu
pal que quiera subir y entrar al horriu.
Más, si tien seis pegollos, ye panera.

---